A carchi sessànta chilometrus de Casteddu e a is peis de su lagu Mulàrgia, cuau in mesu a is matas de chercu e a profumus de crachis tipicus de su Mediterraneu, su parcu archeologicu de Pranu Muttedu s’àrtziada in unu logu – de carchi 200 mila mq – aundi c’est sa prus manna preséntzia (in Sardigna) de menhir e de morimentus megaliticus de su tipu a cìrculu.
Is menhiris si pointi acattai postus in lìnias – su prus longu est su chi est fatu de binti perdas -, a grupus de tres, a duas, e puru – ma est prus diffitzili – ‘e solus. Is morimentus prus carateristicus funti cussus a tùmulu formaus de unu pàtiu, unu corridòriu po s’intrada e unu aposéntu quadrangulari, mentras su muru perimetrali est a pranta circulari, medas bortas acircada de cirulus prus mannus. Medas funti puru is domus de janas, stuvioladas cun pretzisioni in s’arrocca.
Su morimentu prus monumentali e importanti, su morimentu II, cunsiderau cumenti sa pati prus importanti de totu su logu sacru, preséntada elementis de domus de janas e de morimentu a circulus. Unu morimentu paticulari meda e suggestivu est sa trìadi, numenada di aici poita ca est posta inantis a tres menhiris.
Is scàvus archeologicus de is annus '80 s’anti bogau torra repertis de etadi Neolìtiga e Eneolìtiga, chi fainti riferimentu po sa pati prus manna a sa Curtùra de Otzièri (3200-2800 i.C.), e anti potau is studiosus a interpretai su logu cumenti logu sacru mera mannu po su cultu de is avus.
Cumenti si ‘n ci arrìbada: partendi de Casteddu si pìgada sa s.s. 131 fintzas a su km 21,900 po cambiai po sa s.s. 128 po Senorbì. Arribaus a su céntru de sa bidda, in sa pratza de su Comunu, si pigada s’arruga po Santu ‘Asìli, si fainti 6 kilometrus e 800 metrus e si àndada in diretzioni Goni. Atrus 4 kilometrus de s’iscaxadorgiu po Silius e s’acàtada su logu archeologicu.
Testo e foto: Alessandra Ghiani
Traduzione: Cesare Giombetti
