Chida de Ferraustu caente pro su ‘Terminal crocere’ de Casteddu: dae su 13 a su 19 austu ant a èssere 7 sas naves acasagiadas a sas banchinas de su portu, tres de sas cales ant a arribbare cras. Oe est istada sa borta de sa lussuosa Celebrity Reflection, chi at atracadu a mesudie a su Molu Rinàschida.
Sa nave, chi tenet bandera maltesa, apartenet a su brand americanu Celebrity Cruises de su grupu Royal Caribbean, e acasàgiat 2.900 passigeris – belle totus americanos – e 1.200 membros de echipàgiu.
Cras ant a atracare a su Molu Rinàschida sa MSC Divina e s’Aurora de su brand inglesu P&O, mentras a su Molu Ichnusa at a fàghere bella mustra sa minore e isfartzosa Seven Seas Voyager, de sa cumpangia americana Regent Seven Seas. In totale belle 10.000 passigeris ant a arribbare in tzitades giai de bonu mangianu, pro lassare sa tzitade in su tardu merie.
