Sa Sardigna est istada in sos ùrtimos tres annos, de sos tempos de su “Movimentu de sas valigeddas”, sa capitale de sa protesta contra sos trasferimentos de sos dotzentes a largu de domo. E immoe incassat una vitòria.
Partziale, pro ite bàlida solu un’annu, ma de importu: belle una chentina de insegnantes in foras de sede, mandados fintzas a Sestri Levante, Varese, Ostia e Civitavecchia, ant a pòdere torrare cun sas famìlias issoro.
Sindacados e Miur ant firmadu s’acòrdiu in sas assegnatziones provisòrias: chi tenet meses de esperièntzia in s’amparu podet, fintzas sena ispetzializatzione, èssere assignadu a un’iscola de sa pròpia Regione o de sa pròpia Provìntzia.
