Pro sa prima borta in Sardigna una pitzinna est istada registrada a su Comunu comente fìgia de duos babbos.
Su fatu, at contadu domìniga in sa Nuova Sardegna, pertocat su detzisu de sos giùighes de su Tribunale de Tàtari chi ant retificadu unu atu de nàschida in ue fiat indicadu su nùmene de su solu babbu biològicu.
Totu est incumentzadu in su 2016, annu de nàschida de sa minore. Sa còpia, oe unida in manera tzivile, at impreadu sa “gestazione pro unos àteros” (Gpa) in Califòrnia. Unu mètodu – cuddu de sa maternidade surrogada, chi est proibidu in Itàlia. A pustis de sa naschida, su detzisu de fàghere ricùrsu pro su prenu reconnoschimentu de sa genitorialidade a ambos is babbos. Pagos dies faghet unu decretu de su collègiu de sa segunda setzione tzivile at decretadu chi sos duos babbos, agiudados dae s’assòtziu Famiglie Arcobaleno, sunt a totus sos efetos sos genitores de sa pitzinna, chi oras tenet duos annos e mesu. In su decretu sos giùighes sutalìniant chi “s’ordinamentu nostru non previdet chi sa funtzione genitoriale depet èssere collegada a s’orientamentu sessuale de su genitore o comente si siat a su fatu chi sos genitores siant de sessu diferente”.
