Andrea Murgia, 46 annos, seulesu e funtzionàriu de sa Cummissione Europea, at a èssere su candidadu de s’Autodeterminatzione a sa presidèntzia de sa Regione. Custu mangianu s’annùntziu ufitziale in nd’unu atobiu cun is giornalistas in Cussìgiu regionale. In paris cun Murgia nche fiant sos rapresentantes de sas 8 siglas postas cun su movimentu: Rossomori, Sardigna Natzione, Irs, Liberu, Sardigna Possìbile, Gentes e Radicales Sardos.
Sa candidadura de Andrea Murgia est su frutu de unu traballu mannu, de unu percursu cumpartzidu dae totus sas fortzas riunidas a inghìriu de Autodeterminatzione – at naradu su cussigeri regionale de sos Rossomori Emilio Usula – est unu signale de isperu pro giùghere dae in antis su progetu de emantzipatzione de sa Sardigna».
«Autodeterminatzione torrat a si presentare a pustis de sas eletziones polìticas – at agiuntu su presidente de su movimentu Fabrizio Palazzari – su nostru est unu movimentu abertu, naschidu pro rapresentare sa Sardigna e sos sardos chi bivent a foras de s’Ìsula. Su candidadu nostru , a diferèntzia de cussos de sas àteras coalitziones indicados dae Milano e Roma, est istadu seberadu in Tramatza».
Andrea Murgia, chi in su 2009 est istadu candidadu in su listinu de Renato Soru e in su 2014 at leadu parte a sas primàrias de sa coalitzione de su tzentrumanca, at aderidu a sos Rossomori su 2 trìulas cùrridu, die de s’iscumparta de Gesuino Muledda chi de cussu partidu est istadu fundadore e leader polìticu. «Apo detzìdidu de lassare su perìmetru de su tzentrumanca e de su Pd a pustis de su referendum de sas trivellas – at ispiegadu Murgia – su diàlogu meu cun Autodeterminatzione est incumentzadu un’annu faghet. Apo cojuadu custu progetu pro ite bido assoluta lealidade intre sas fortzas polìticas chi lu sustentant e caminant in sa matessi diretzione”.
