Essit a s’iscobertu su sìndigu de Bottida e cussigeri regionale de Art1 Sdp Daniele Cocco, e annùntziat de èssere unu de sos sustenidores de sa candidadura de Massimo Zedda a guvernadore de sa Sardigna.
Ddu at naradu oe a s’agentzia Ansa: “Lego cun perplessidade sos decraros de su cinquestelle Cabras su cale pedit chi fine ant fatu sos 130 sìndigos chi sustenent a Massimo Zedda comente guvernadore de sa Sardigna. Deo so unu de sos chi creet chi custa proposta rapresentet a beru unu passadòrgiu de importu mannu in unu cuntestu econòmicu e sotziale chi bidet s’ìsula sofferente. Zedda est sa persone giusta pro rapresentare su pòpulu nostru, ddu dimustrat s’istòria sua chi mèritat manna istima, chi deo e su grupu regionale meu li reconnoschet. Duncas pro custu pedo a Màssimu de si pònnere a disponimentu”.
