Sabadu 27 de su mese de santugaine dae sas bator de su merie, cun partèntzia dae sa plaia de Bonaria a Su Siccu, s’at a tènnere sa Copa de San Saturnino, gara isportiva de dragon boat e canoa in sa distàntzia de sos 300 metros, in collaboratzione cun s’Asd “I Dragonauti” e sa Lega Navale de Casteddu.
Pro sa categoria de gara dragon boat ‘Pink Lady’, ultres a s’iscuadra Karalis Pink, b’ant a èssere, in rapresentàntzia de su movimentu natzionale “Donne in Rosa, Dragon Boat”, sas iscuadras bènnidas dae Roma, Bergamo, Milanu, Torinu, Avigliana, Mestre e Pàdova. Sunt prevìdidas 6 baterias, ognuna fata dae tres echipàgios. Ogni echipàgiu est formadu dae 22 atletas.
Sas garas ant a èssere pretzèdidas a sas oras 15, in sa sede de s’Ammiragliadu de Casteddu in s’arburada Colombo, dae una Tzerimònia de abertura e una cunferèntzia a pitzus de s’importu de sa preventzione de su tumore a su sinu, a cura de sa Lilt de Casteddu.
A su tèrmine de sas garas sos tres dragones ant a segudare s’ispàtziu de abba in antis de s’Ammiragliadu, in manera simbòlica illuminadu de rosa, ue a sas 18.30 s’at a Tzelebrare “Sa Tzerimònia de sos Fiori”. A ogni fèmina in rosa at a bènnere donadu unu frore chi in manera simbòlica at a èssere rèndidu a su mare in memòria de sas cumpàngias de iscuadra chi non b’ant prus.
Sa Copa de San Saturnino est insertada in su progetu “Il cammino di San Saturnino” chi tenet comente punna sa valorizatzione de su territòriu pro mèdiu de su cultu, s’istòria, sa cultura, s’enogastronomia, sas traditziones, s’isport.
