“S’ex depòsitu carburantes de s’Aereonàutica de Monte *Urpinu, in Casteddu, at a bènnere assignadu a sa Caritas sena carchi bandu, a lìbera discretzione de s’assessore Cristiano Erriu”.
S’acusa a sa Regione arribbat dae sa deputada sarda de su M5s Emanuela Corda chi faeddat de operatzione “de sa giunta regionale targada Pd”, chi “tenet totu s’àera de èssere eletorale”. Sa parlamentare afirmat fintzas chi “in manera contrària a sas promissas fatas, s’àrea no est istada aberta a sos tzitadinos” in cantu sa Regione dd’at tenta cungiada “faghende divenire custa meravìllia unu depòsitu abbandonadu”.
“Firmu chi donare un’agiudu a sas persones in dificultades est sa prima missione pro totus e chi sa Caritas at semper acumpridu unu ruolu essentziale chi mèritat totus sos atentos nostros”, pretzisa Corda, “sa duda est si a beru, un’ispàtziu gai bellu chi diat abbratzare su Parcu de Monte Urpinu, non mèritas però de èssere rèndidu a totus sos tzitadinos. Ma mescamente”, concruit, “si pretendet bèngiat respetada sa legitimidade de s’afidamentu, sa trasparèntzia, s’ecuidade”.
