Sìndigos e comitados de totus sos territòrios de sa Sardigna in pratza pro pedire s’annullamentu de su riòrdinu de sa retze ospedaliera aprovadu dae su Cussìgiu regionale e scrocorigada dae su ministeru de sa Salude. Sunt diversas chentinas sos manifestantes chi partètzipant a su longu corteu organizadu in Casteddu dae sa Retze Sarda a Defensa de sa sanidade pùblica. Partidos dae pratza de su Carmine, ant cursadu sa bia Roma finas a su palatzu de su Cussìgiu regionale, ue s’at a tènnere unu presidiu.
“Semus inoghe pro protestare contra sos trincos a sos servìtzios sanitàrios pùblicos e sa serrada de sos ispidales de sos territòrios discumbeniosos e de sas matessi mannas istruturas de Casteddu”, at ispiegadu sa portaboghe Claudia Zuncheddu. A sa manifestatzione sunt presentes una deghina de comitados, cumprèndidu cuddu de s’Ìsula de Sa Madalena, in defensa de s’ispidale Paolo Merlo.
