Primu atobiu custu mangianu in s’Àula Magna de su Litzeu Clàssicu “Siotto Pintor” cun su ricu calendàriu de “Viva sa libertade! Casteddu contra sa violèntzia”, initziativa curada dae su Comunu de Casteddu. At a èssere unu longu biàgiu chi, cun s’agiudu de sa Regione Sardigna, at a acumpangiare sos tzitadinos finas a su 25 de su mese de santandria, cando s’at a tzelebrare sa Die Internatzionale.
“Àncora – at ispiegadu s’Assessora comunale Marzia Cilloccu – nch’agatemus in nd’una situatzione drammàtica e pro custu su Comunu nch’est ponende totu su remenu possìbile, a su cale, però, andat agiuntu su contributu de totus. E in custu chertu no esistent banderas pro ite totus depent fàghere cantu in issoro pòdere, mescamente nois de sas istitutziones, pro modificare su sistema e arribare a una paridade bera”.
At bòlidu dare su contribuidu suo, in antis de s’abertura de su dibatu cun sos istudiantes,
fintzas sa cussigera comunale Rosanna Mura. “Amus bòlidu incumentzare dae inoghe pro ite in logos comente a custu b’at semper istadu mannu echilìbriu tra pitzoccos e pitzoccas, una manna possibilidade de crèschere pro totus, sena carchi barriera chi non siat sa fantasia bostra. E sas batallas chi semus faghende non depent èssere fatas isceti daesas fèminas, at a dèpere èssere una batalla chi tèngiat su contributu de totus”.
Fundamentales in custa òtica sunt istados duos provedimentos de sa Regione Sardigna chi sunt istados illustrados dae sas duas cussigeras Anna Maria Busia e Alessandra Zedda.
