Aristanis e Palmas Arborea sighint a s’opònnere a su progetu pro sa realizatzione de un’impiantu termodinàmicu in San Quirico.
Pro martis 13 de su mese de santandria, sa matessi die de sa cunferèntzia in programma in sa sede de s’Assessoradu regionale a s’Indùstria, sos sìndigos Andrea Lutzu e Andrea Pisu Massa ant cunvocadu sos rispetivos cussìgios comunales in Casteddu. Lutzu at imbiadu puru una nota a su Servìtziu energia e economia birde de s’Assessoradu a s’Indùstria pro pedire su rinviu de sa cunferèntzia de servìtzios pro ite diat a fartare elaborados essentziales in sa documentatzione prodùida dae sa sotziedade San Quirico Solar Power srl.
In piessignu Lutzu signalat sa farta de su rinnovu o de s’adeguamentu de sa rechesta pro s’autorizatzione ùnica pro s’assoggettamento de sas àreas interessades dae s’interventu a vìnculu paesagìsticu. “Sa cunvoca in Casteddu de sos Cussìgios comunales de Aristanis e Pramas tenet unu significadu polìticu e istitutzionale – narant sos sìndigos Lutzu e Pisu Massa -. Sas duas prus artas rapresentàntzias istitutzionales territoriales bolent cunfirmare, un’atera borta, sa contrariedade a su progetu de sas istitutziones e de sas comunidades interessadas. Non podemus assistire sena faghere nudda a detzisos impostos dae s’artu chi si traduint in sa fura de su territòriu nostru e de sa capatzidade nostra de ddu guvernare”.
