Dae domìniga imbeniente, 11 de su mese de santandria, Grimaldi Lines at a ativare unu nou collegamentu marìtimu mertzes chi at a collegare Civitavecchia, Terranoa e Casteddu. Su nou servìtziu, tres bortas a sa chida, previdet una lìnia istàbile intre sos duos portos de sa Sardigna, aici de evitare su mudamentu de sas mertzes subra caminu.
Sas partèntzias dae s’iscalu latziale sunt prevìdidas su lunis, mèrcuris e chenàbura, mentras tra su nord e su sud de s’ìsula sunt programmadas su martis, giòvia e sàbadu. “Sa lìnia, chi at a tènnere una durada de un’annu”, ispiegat Massimo Deiana, presidente de s’Autoridade de sistema portuale de sa Sardigna, “cunfirmat sa possibilidade de acurtziare sos duos iscalos de Terranoa e Casteddu cun nd’unu collegamentu chi potzat contribuire a reduire sa cungestione de veturas graes in sas artèrias istradales nostras”.
