4″Su Policlìnicu Tataresu non podet e non depet serrare, est un’istrutura fundamentale in sos echilìbrios de su sistema sanitàriu de su territòriu e non isceti de Tàtari”. Dd’at decraradu su presidente de su Cussìgiu regionale, Gianfranco Ganau, in riferimentu a sa domo de cura privada de Tàtari a sa cale est istada negada sa pròroga de sa cunventzione cun su sistema sanitàriu regionale pro farta de carchi recuisitu.
“Est craru chi custa istrutura non podet serrare, comente est istadu giai prevìdidu in su pranu de riòrdinu de sa Retze ospedaliera, ue sunt istados cunfirmados sos otanta postos letu”, at agiuntu Ganau. “So fiduciosu chi in s’atòbiu de cras at a bènnere agatada una solutzione, pro ite s’assessore Arru tenet bene crara sa valèntzia istratègica de custu ispidale. Tocat, però, risòlvere totus sos problemas tècnicos de missa a norma e posta in seguridade de s’istrutura, chi si trìsinant de annos. Ammentu chi sete annos faghet cando fia sìndigu de sa tzitade aiamus arriscadu sa serrada pro dificultades ligadas pròpiu a interventos pro sa missa in seguridade”.
“Su remenu a banda mea b’at, ma potzo nàrrere chi b’at fintzas a banda de totu su Cussìgiu regionale pro sa defensa de su Policlìnicu tataresu”, at concruidu su presidente. “So cumbìnchidu chi cras amus a tènnere sas rispostas favorèvoles e sas aberturas a banda fintzas dae s’assessore”.
