In Uri, bidda de s’hinterland tataresu in cale bivet, eris sas campanas aiant giai sonadu a morte. E sos familiares, rassignados, si fiant giai acordados cun su pàrracu pro tzelebrare s’interru. Fiat totu prontu: bara acuistada e trafila burocràtica concruida pro su loculo. Ma sa fèmina de 80 annos protagonista de custu singulare fatu est àncora viva: est in cunditziones graves, ricoverada in su repartu de Rianimazione de s’ispidale Santa Annunziata de Tàtari, cun sa prognosi riservada. Lunis a mangianu sa fìgia dd’at agatada in su bagnu de domo, in terra, corfida dae un’ictus. S’antziana est istada carrada in ispidale cun nd’una ambulantza de s’assòtziu de volontariato e ricoverada.
Carchi ora a pustis sos parentes sunt torrados in ispidale pro ischire sas cunditziones suas. “Est morta cerebralmente, oramai non b’at prus nudda de fàghere – diat àere naradu a issos unu dutore de su repartu – Si bolides podides firmare s’autorizatzione a s’espiantu de sos òrganos”. Dolorados, ant firmadu e ant acunsentidu a s’espiantu de sas corneas. Torrados in bidda, si sunt dedicados a sos preparativos pro s’interru de sa parente. Ma eris a mangianu, torrados in ispidale, ant iscobertu chi sa betza est àncora in vida: grave ma àncora viva.
