Sardigna Natzione Indipendentzia no at a leare parte a sas ‘primarias’ e no at a candidare pròpios esponentes a sas consultatziones promòvida dae su Partidu de sos Sardos pro su 16 de su mese de nadale pro su sèberu de unu candidadu a sa presidèntzia de sa Regione Sardigna a sas eletziones de su freàrgiu 2019.
“Cussas primarias sunt primàrias in àmbitu regionale sardu ma natzionale italianu, abertas, in candidadura e votu, a creaturas polìticas chi nudda tenent a chi bìdere cun sa cultura polìtica de sa natzione sarda”, ispiegat su moderadore de Sni, Bustianu Cumpostu. “Sni est cumponente de ‘Autodeterminatzione'”, pretzisa, in riferimentu a sa compagine chi at giai indicadu Andrea Murgia comente a pròpiu candidadu presidente, “s’ùnica Domo Comuna chi si proponet comente a creatura polìtica e sotziale de sa natzione sarda, natzione chi esistet e produet polìtica alternativa a cussa de sa sudditanza e de sa collaboratzione”.
“S’istadu de natzione de unu pòpulu est unu bene indisponibile, niuna generatzione ddu podet cuntratare e tantomeno unu partidu polìticu”, sustentat Cumpostu, in chistione cun su presidente de su Partidu de sos Sardos, Franciscu Sedda. “Nche permitamus de ammentare a Sedda e a su PdS chi sa Natzione Sarda esistet e bisòngiat de s’indipendentismu pro dda liberare”.
