Sa Regione at destinadu 16 milliones de èuros a su Fundu pro su microcreditu. De custos, 4 sunt istados prevìdidos in s’ùrtima delìbera de sa Giunta e ant a serbire pro crèschere sas risursas de s’avisu 2018 – ativadu in ghennàrgiu e serradu in làmpadas – giai finantziadu cun 6 milliones de èuros. Sos àteros 12 milliones sunt istados deliberados pro fàghere partire intro sa fine de ocannu unu bandu nou pro su microcreditu.
Sa sebera previdet unu finantziamentu a tassu zero, tra sos 5 mila e sos 25 mila èuros, de torrare ratealmente in màssimu 5 annos, pro sustentare s’inghitzu de un’ impresa. S’aina, illustrada oe dae s’assessore regionale de su Traballu, Virginia Mura, est destinada a totus cuddas persones disocupadas o ocupadas, chi non sunt ‘bancabili’, est a nàrrere chi non tenent carchi possibilidade de otènnere unu prèstitu d pro aviare un’ impresa o una faina.
Su Fundu pro su microcreditu est naschidu in su 2009, cun risursas de su Programma operativu regionale 2007-2013 e, finas a oe, at tentu una dotatzione de 78,5 milliones de èuros, eroghende 93 milliones de èuros totales. In oto annos, de su 2010 a làmpadas, in s’Ìsula sunt istadas presentadas 12.300 dimandas e sunt istados finantziados 3.921 progetos, de cales su 49% presentados dae fèminas. Finas a oe sunt 822 cussas chi ant torradu su prèstitu. Sos chi istant àncora paghende sas ratas sunt 2.400, mentras de sos 840 chi ant revocadu, sa metade dd’at fatu pro sa serrada de s’impresa.
