“Unu istrada destinada a èssere papara dae su mare o de sas prenas de sos rios chi arribbant dae su monte”. Impreat custas paraulas sa sindaca de Pula, Carla Medau, pro descrìere su tratu de istatale 195 prus corfidu dae s’undada de tempus legiu chi at postu in ghenugru su sud Sardigna. Est su cantu de caminu dae in antis sa zona ùmida de s’istàniu finas a su tzentru abitadu de Cabuderra.
“De sa 195 faeddaiant sos babbos nostros – ammentat sa prima tzitadina – immoe semus in sas cunditziones de dèpere contare s’istòria sua a sos nebodes nostros sena chi in tantu si siat agatada una solutzione”.
Comente a amministradore, atacat, “non semus prus in sas cunditziones de tutelare sos tzitadinos: est oras de nàrrere basta”. Basta “a s’inèrtzia de s’Anas chi tenet sa dèlega de su guvernu”. “Aprètzio – ammitet Medau – sos isfortzos chi s’ente est faghende in modu massitzu e risolutivo in custas oras, ma si tratat solu de cosas chi non risolvent de seguru sos problemas. Sa Regione depet puntare sos pees e su ministru de sos Trasportos Toninelli bèngiat in s’Ìsula pro cumprendere de ite semus faeddende”.
