Su cussigeri regionale Fabrizio Anedda (Mistu) denuntziat cun nd’una interrogatzione anomalias, presumidas, in su gastu de unu millione de èuru pro su progetu ‘Overdenture’ finantziadu dae sa Regione pro assegurare protesi dentarias fintzas a is tzitadinos economicamente isvantagiados de sa Sardigna. In su documentu, giradu a su presidente de sa Regione e a s’assessore de sa Sanidade, tzitat sa nòmina de tres mèdicos o dentistas, pro sos cales fiat istada bandida un’issèbera pùblica, “ma de sos tres professionistas esaminados isceti unu est istadu contratualitzadu, mentras sos àteros duos no ant partetzipadu a s’issèbera”.
“In su cuntratu de consulèntzia – at ispiegadu Anedda – non sunt istadas ispetzificadas sas mansiones chi diant àere dèpidu acumprire sos dutores pro unu cumpensu de 50 mila èuru pro ognunu. No est istada, annotamala, bandida sa gara de apaltu pro s’achistu de protesi dentarias pro unu balore de belle 150 mila èuru, non b’est istada sa tzertificatzione de sos materiales impreados pro sas protesi e est istada violada sa privatesa de sos malàidos curados”.
Su cussigeri at posca agiuntu chi “est mancada fintzas un’adeguada publitzidade de s’initziativa, tantu chi sas dimandas arribbadas sunt istadas belle 900 (de cales 820 idòneos) in nd’una platea de belle 80 mila potentziales benefitziàrios”. Segundu cantu referidu dae Anedda, sos fundos sunt istados impreados pro s’achistu de 500 protesi e 1000 impiantos e, segundu datos agiornados a su nadale 2017, sunt istados sighidos 270 malàidos, insertados 822 impiantos e cunsignadas 428 protesi.
