Intitulada a Pier Paolo Pasolini sa terratza in su parchègiu de sa ruga Manzoni. Posca 43 annos dae s’iscumparta, manna partetzipatzione custu mangianu, in Casteddu pro s’intitolazione de sa terratza-giardinu, a pitzu du su parchègiu multipiano de sa ruga Manzoni, a Pier Paolo Pasolini, “unu de sos majores intelletuales de su Noighentos italianu dae sa sconfinada produtzione artìstica, in tèrmines literàrios, giornalìsticos, tzinematogràficos e teatrales”.
A ddu nàrrere est Sergio Mascia, presidente de s’Assòtziu Pasolini, Roberto Tramaloni presidente de sa Cummissione consiliare Afares generales, e su sìndigu Massimo Zedda, chi in antis de iscobèrrere sa targa tenet fintzas sutalineadu s’istatura umana de Pasolini, “chi aiat anticipadu medas temas oe a su tzentru de s’atentu pùblicu e mediàticu”.
A sa tzerimònia fintzas carchi rapresentante de s’Assemblea e de s’Esecutivu tzitadinu. Intre issos Luisa Anna Marras (assessora a sas Polìticas de sa Domo e Mobilidade), Francesca Ghirra (assessora a sa Pianificatzione istratègica e Urbanìstica) e Paolo Frau.
“In su prenu de su bighinadu de San Beneitu – at naradu Frau in calidade de assessore a sa Cultura – su allestimentu de custu ispàtziu rispondet fintzas a sos bisòngios de medas residentes chi si bolent godire un’ispàtziu birde attrezzadu sena dèpere rinuntziare a sa cumpangia de sos pròpios canes”. S’àrea est difatis partida in duas zonas distintas.
