Creschida de s’intzentivu a s’assuntzione pro sos traballadores a tempus indeterminadu finas sa cobertura de su 50 pro chentu de su costu lordo de su sìngulu traballadore (30 pro chentu pro sos traballadores a tempus determinadu); suprimida sa cuota màssima de 100 mila èuru pro sìngula impresa. Sunt sas printzipales novidades de una delìbera de sa Giunta regionale, pro sa cale sa cummissione Traballu de su Cossigiu regionale at espressadu a s’unanimidade su pàrre favorèvole.
Sa novidade est istada illustrada dae s’assessora a su Traballu, Virginia Mura, e est istada acollida in manera positiva dae sa cummissione presidida dae Piero Comandini. “Est – at sutaliniadu Mura – una riscrttura de sas normas, chi in antis imbetzes previdiant unu contributu màssimu de 4 mila èuru a traballadore (3 mila pro su tempus determinadu) e est pro custu chi isceti 462 traballadores sunt istados ocupados pro mèdiu de Lavoras, nointames sa Regione teniat unu fundu de 40 milliones de èuros comente a monte pro sos intzentivos. B’at ateru: in sa noa formulatzione sa medida est girada a sas impresas in sensu istrintu ma fintzas a sos traballadores autònomos e faghet a aplicare fintzas pro sos apprendistas. Duncas, nd’ant a benefitziare totu sos tipos de traballadores e de datores de traballu”.
