B’ant ritardos in s’interventu programmadu dae s’Enas in s’acuedutu chi alimentat sos impiantos de potabilitzatzione serbidos dae su Coghinas. Pro mori de unu segundu guastu s’erogatzione de s’abba no at a pòdere èssere ripristinada in sos tempos prevìdidos a Portu Turre, Istintinu, S’Alighera e Casteddu Sardu. Abarrant ativos sos servìtzios sostitutivos de autobottes e sos puntos fissos de prelievu.
Sos tècnicos de s’Enas – comùnicat Abbanoa – ant preventivadu unu slittamentu de bator/chimbe oras respeto a sa abertura programmada pro sas 19. De cunsighèntzia, sa ripresa de sa produtzione de abba potàbile in sos impiantos pro sos tzentros interessados at a subire unu ritardu. Totu sas iscuadras de Abbanoa, siat sos tècnicos in sos potabilizzatores siat sos operadores de retze, sunt mobilitados pro reduire sos disservìtzios cantu possìbile.
